තිහාරිය මැද වෙසක් නිර්මාණ සීයයක්

තිහාරිය ඉසිපතනාරාම විහාරස්ථානය මූලික කරගෙන  සංවිධානය කරනු ලබන වෙසක් කලාපයේ ආරම්භක වැඩසටහන  එලඹෙන වෙසක් පුර පසළොස්වක පොහෝ දින උදෑසන ආරම්භ කිරිමට කටයුතු සූදානම් කර ඇත.

වෙසක් පුර පසළොස්වක පොහෝ දින උදෑසන ධාතූන් වහන්සේලා උදෙසා කිරි ආහාර පූජාව හේවිසි නාද මැද පැවැත්වීම,  දහවල් සම්බුද්ධ පූජාව වෑංජන  තිස් දෙකක් සහිතව හෙවිසි නාද මැද පැවැත්වීම, සවස හයට පමණ උතුම් වෙසක් කලාපය ආරම්භය සනිටුහන් කරමින් ධාතුන් වහන්සේලා වන්දනාමාන කරමින් ආශිර්වාද සම්බුද්ධ පූජාව පැවැත්වීමට කටයුතු යොදාගෙන ඇත.

අනතුරුව  විහාරාධිපති ස්වාමීන් වහන්සේ වන අති පූජ්‍ය ඉහළගලගම පඤ්ඤාරතන හිමියන්ගේ අනුශාසනාව පැවැත්වීමෙන් අනතුරුව වෙසක් කලාපයේ  සියලුම නිර්මාණයන් සතර පේරුවේ දායක දායිකාවන්ගෙ දායකත්වයෙන් ආරම්භ කිරීමට මේ වන විට කටයුතු යොදා ඇත.

තෙදින තුළ,

• ධාතු ප්‍රදර්ශනය
• අඩි පනහක් උස තොරණ ඇතුළු ප්‍රධාන තොරන් තුනක්
• වංකගිරිය
• රූකඩ
• දළදා මාලිගාව අනුරුව
• රුවන්වැලි මහා සෑ අනුරුව
• සිහින දහසය
• මුචලින්ද නාග දරණය
• නාලාගිරි දමනය
• අපාය
• උපත,බුදුවීම,පරිනිර්වාණය
• පිරිත් මණ්ඩපය
• බැති ගී
• කැරකෙන කූඩු
• සතර පෙර නිමිති
• නාගීනා
• නිර්මාණ සහිත නැව

ඇතුළු නිර්මාණ සියයක්  දැක බලා ගැනීමට හැක.

ගමන් මාර්ගය,

ගම්පහ දිස්ත්‍රික්කයේ තිහාරිය නගරයේ වාරණ රජමහා විහාරස්ථාන මාවතේ මීටර් පන්සීයක් පමණ පැමිනෙන විට ඉසිපතනාරාම මාවත දැක ගත හැක.එහි සිට කිලෝමීටර් දෙකක් පමණ දක්වා මෙම වෙසක් කලාපය විහිදී පවති.

වෙසක් කාලාපයේ ඡායා රූප කිහිපයක් පහතින්.